18 may 2020-ci il tarixində “Qobu park-3” yaşayış kompleksinin, eləcə də Birgə İnvest-in və KOBİA-nın dəstəyi ilə burada təsis edilən iki istehsal müəssisələrinin açılışı baş tutmuşdur. Açılışda Azərbaycan Respublikasının Prezidenti cənab İlham Əliyev və birinci xanım Mehriban Əliyeva iştirak ediblər.

Müəssisələrdən biri olan “Gill Med” MMC eyni brend adı ilə tibbi heyət və xəstələr üçün geyimlər, maskalar ilə yanaşı Azərbaycanda ilk steril cərrahi setlər istehsal edəcək. Digər müəssisə isə “Caspian Textile” MMC müxtəlif növ uniformaların istehsalı ilə məşğul olacaq.

Hər iki müəssisədə ümumilikdə 70-dən artıq iş yerlərinin açılması və işçi heyətinin 80%-nin həssas əhali qrupuna aid vətəndaşlardan formalaşması nəzərdə tutulub.

Layihələrin məqsədi ölkədə yeni iş yerlərinin qurulması, rəqabətə davamlı, keyfiyyətli, ən əsası, idxaldan asılılığının azaldılmasını təmin edəcək məhsulların istehsalıdır.

“Birgə İnvest” hər iki layihəni tam maliyyələşdirmiş, biznesin planlaşdırılması və idarə edilməsi, işçi heyəti üçün təlimlərin təşkili istiqamətlərində dəstək göstərmişdir.

Gələcəkdə müəssisələrin genişləndirilməsi, məhsul çeşidlərinin artırılması və xarici bazarlara çıxarılması gözlənilir.